علاش برشة أنواع غلة و خضرة يجريو الكرش
موش كان الفلفل برشة أنواع غلة و خضرة يجريو الكرش…
باش نعرفو السبب يلزمنا نعرفو علاش النباتات تنتج في الغلة؟
باش تتكاثر النباتات تصنع بذور… البذور هاذي تحاول تزرعها بعيد على الشجرة الأم.. هذاكا علاش تلقاها ساعات تطير مع الريح أو تتنقل مع الماء… لكن فما نبتات تستعمل الحيوانات باش ينقلولها بذورها… حول البذرة تصنع النبتة ثمرة مغذية باش الحيوان ياكل الثمرة و يلوح البذرة بعيد باش تنبت و تعطي نبتة جديدة في منطقة بعيدة…
بعض النباتات طورت طريقة أخرى… البذور تتاكل مع الثمار.. تتعدى في الجهاز الهضمي و البذور تتلوح مع فضلات الحيوانات أين تنبت… لكن المشكل اللي بعض البذور ما تتحملش السوائل الهضمية و تموت.. هذاكا علاش النبتة تصنع مع البذور مواد تسبب إسهال.. باش البذور متاعها ما يبقاوش فترة طويلة في الجهاز الهضمي و ما يموتوش. هذا حال الفلفل اللي يصنع مادة اسمها كابسايسين تسهل الطبيعة.
يعني النبتة اللي ماشي في بالنا نستغلو فيها و تعطينا في خيراتها.. هي في الواقع تستغل فينا تصنعلنا ثمار باش نوزعولها بذورها…
المرة الجاية كيف تاكل كسكروت كفتاجي حار و يصيرلك إسهال..أعرف راك بجلالة قدرك ماك إلا وسيلة من وسائل التكاثر عند الفلفل.
الباحث إقبال الشايب، المركز الجهوي للبحوث في البستنة والفلاحة البيولوجية بشط مريم.